يانـاس بالعـادات شفنـا الغيـاره=رخص الشرف والطيش دقت  طبوله 


بعض شباب اليـوم ضيـع  وقـاره=خص الذي درب المعاصـي ميولـه 


مايفهم اللـي ينفعـه مـن  دمـاره=ولا يحتـرم دينـه وملـة  رسولـه 


يعوم طول الليـل فـي كـل حـاره=مابه شـرف دنيـا ولابـه رجولـه 


يفرض على نفسه اسلوب  الحقـاره=ومن شان فعله مانفع زيـن  زولـه 


على الخنا يسهـر ويرقـد  نهـاره=وأمـه وأبـوه مضيقتهـم  فعولـه 


عقله ضعيـف ويدّعـي بالشطـاره=ولـه شلـةٍ لا مرهـم  صفقـولـه 


من بينهم معـروف رمـز الأشـاره=وان طافهم مـا شافهـم  صفرولـه 


سلـك التفاهـم بينهـم والعـيـاره=الفاظ تنفاهـا النفـوس  الخجولـة 


قالـوا تعـال وكلهـم  بانتـظـاره=نبي لنا مع هجعـة النـاس  جولـه 


خسـارة ياكبرهـا مـن خـسـارة=ليا عـوّد البالـغ لعقـل  الطفولـة 


واستثني اللي نهج درب الاخيار كاره=المستقيـم اللـي نزيهـه  اسبولـه 


اللي مع الطـرق السليمـه مسـاره=حافظ مبـادي سمعتـه  والحمولـه 


العقـل والديـن الحنيفـي  شعـاره=وجيران بيته بالصلاة اشهـدوا  لـه